Shillong, Mar 10: Adita salrangna skang, Saudi Arabia a•songni Riyadh songjinmao ong•atanggipa chang 76-gipa Santosh Trophy-o gnigipa biapko man•e re•bagipa Meghalaya Football Team ba Meghalaya a•dokni robol kal•gipa dolna Sukrobar salo, Meghalaya Sports & Youth Affairs Department-ni gita Road Show ba ramao re•jome mesokaniko ong•atangaha.
Ia Road Show-ko Mawlai Madan Heh-oni a•bachengate Laitumkhrah-ni Madan Iewrynghep-o matchotataha aro ia road show-o bang•bea manderang bakko ra•angtokaha.
Robol kal•giparangna aro uamangna dakchakgipa official-rangna ja•mano dingtangmancha Laitumkhrah-ni Madan Iewrynghep-o Sports Minister Shakliar Warjri aro Meghalaya Football Association-ni membor-rangni dongpaanio Sports department-ni gita mande ra•pilskaaniko dakangaha.
Meghalaya a•dokko man•chengaonin ia chango skanggipa changna Meghalaya Football Team-ba Santosh Trophy-na robol kal•susaanio final round ba bon•kamgipa kal•aniona sokdochengahachim ine nikna man•a. Final kal•susaanio Meghalaya dol, goal 2-3-chi Karnataka dolni jako amako man•skaahachim.
