Shillong, Nov 7: Meghalaya a·doko mongsongbate Bengalirangko onchepe dakanirang ong·enga ine tol·e matnanganio pangchake a·dokni a·palchi jegalanirangko dakenganiara politicalni gita su·dodoaniko man·esa ine nikatna man·enga ine Meghalaya sorkari Sukrobar salo aganaha.
Iani bidingo sing·anirangna, jemangan ia mamlako wa·al so·dona jotton ka·engachim uamangni kosako raka ja·kuko de·anggen ine mikrakataniko on·enba dakchakgipa skotong minister Pa Prestone Tynsong aganchakaha.
A·dokni a·palchi Meghalaya-oni tribal manderangni kosako je dolrangan jingjengatengachim, uamangkoba a·doko tribal aro gipin jatrangni gisepo meli-nangrime dongenganiko golmal ka·pajachinaba ua mol·molaha.
Indake ong·engon, a·dokni, mongsongbate Bengalirangni kosako maiba kragija dakanirang donggenchimode Kolkata-o jingjengatenggipa dolrangko mikkanggrike golporimna re·bachina Pa Tynsong okamaha.
A·dokoni neng·nikanirangko namatna Kolkata-chi ong·ja indiba Shillong-osa man·gen. Uni gimin agangrikna re·babo ineba dakchakgipa skotong minister aganaha.
Indake janapjolna man·gen je, All Bangali Youth & Students’ Organisation (ABYSO)ko man·chape Kolkata-oni gimik dol-chikking nangrimgimin dol mija Bristibar salo Meghalaya House Kolkata-ni u·irikanio a·dok sorkarina ge·sa memorandum-ko on·angaha.
“Obostako wa·al so·dopanabe, maina Ichamati-ni gimin aganode pilak obostarangko nirokna gita sorkari gnang aro Meghalaya-ni tribal ong·oba gipin jat ong·oba jatgnini naljokanina sorkarian daito ra·e kamko ka·enga. Chinga ku·cholsan kam ka·e ku·cholsano dal·roroenga,” ine Pa Tynsong aganaha.
Unbaksana, Meghalaya-o songdonggiparangni naljokanina West Bengal sorkari baksaba a·dokni skotong minister Pa Conrad Sangma agangrikaha ine ua koborna talatdapaha.
