Shillong, June 28: Meghalaya a•dokni Additional Chief Secretary Rebecca V Suchiang, da•o Meghalaya Energy Corporation Limited (MeECL)-ni gital Chairman-cum-Managing Director (CMD) ong•e jako ra•angskagnok.
Iani bidingon a•dokni Chief Minister Conrad K Sangma, re•anggipa Sukrobar salon ge•etaniko on•atmanaha ine Sombar salo jinmana parakataha.
“Abi Rebecca, a•doko ja•delbatsranggipa officer-rangoni saksa ong•a aro ua finance-koba jako ra•engani gimin kamrangko nambate ka•angna man•gen ine anga ka•dongenga. Iako janapengon, anga gitcham chairman-ni kamrangko nama ba namja inede miksongjaenga indiba ian namen rakbegipa obostao ong•engani gimin rakgipa ja•kurangko de•na nangao ga•akenga. Anga bebera•a ia gital ja•kuko de•anichi MeECL-ko chalaianio an•ching namrorobaaniko nikna man•gen,” ine Sombar salo, Chief Minister kobor ra•timgiparangna parakataha.
MeECL-ko dilna gita a•doko ja•delbatsranggipa civil service officer-rangoni saksako seokchina dingtang dingtang dolrang dabitokengachim ine nikna man•a.
Ia bilsini gisepo MeECL, gong kror 900-mangni gita noksan ong•atako man•naba gnang ine janapatengon, da•o mikkang jachet ba jaskuni gisepo MeECL, tangka paisani gita namen neng•nikanirangko chagrongna sienga ine Chief Minister parakataha.
“Uni giminsa iandakgipa obostao MeECL-ko nambate chalaidilna aro tangka paisani kamrango nambate kamrangko ka•na man•na gita chinga finance-ni kamrango u•i-ma•sigipa aro saksa ja•delbatsranggipa mandeko nangnikaha,” ine Chief Minister aganaha.
MeECL-ni gital CMD-ko songahaoba bakande dingtanganiko nikna man•jawa ineba Sangma talataniko on•angaha.
MeECL-ko chalaianio pilakni gitan neng•nikanirangko chagrongna nangenga ine janapatengon, company-rangko bak dakani, kam ka•giparangna bangki dongkuenggipa gong kror 800-ni terminal benefit-ko on•ani, dingtang dingtang power company-rangna grorangko chotani aro uandakgipa pilak kamrangon neng•nikanirangko chagrongna nangenga ine Chief Minister parakataha.
MeECL-ni tangka paisarangko nambate chalaichina gita opposition dolni dabienggipani bidingo janapatengon, iandakgipa obostao sorkari maming politics-ko kal•na nangnikani dongja ine Sangma parakataha.
Gital CMD-ko songanichi walsanon obostarang dingtanggnok inede sorkari miksongjaenga indiba bilakbatgipa dolko riknasa ka•dongenga ineba Chief Minister parakataha.
MeECL-ni gital CMD-na songako man•gipa additional chief secretary, gipin department-rangkoba nina nange neng•nikanirangkode man•enga ine janapatengon, ja•mano sorkari MeECL-na pangkamgipa CMD-ko seokna cholrangko niangskagen ine Sangma parakataha.
“Uni gimin CMD ong•kamnagipa mandeko man•kujaskal chinga finance-ni gimin u•i-ma•sigipa aro a•doko ja•delbatsranggipa officer saksako MeECL-ko re•dilna nangnikaha,” ine Chief Minister aganaha.
