Tura, Oct 1: Re•baenggipa bilsio Meghalaya a•dokni bilsi 50 gapaniko maniani bak gita a•dok sorkari, ming 50 gital project-rangko a•bachengatgen ine Sukrobar salo, Meghalaya a•dokni Chief Minister Conrad K Sangma parakataha.
Meghalaya Assembly-ni Deputy Speaker Timothy D Shira, Kharkutta-ni MLA Rupert Momin aro Bajengdoba-ni MLA Pongseng Marak-ni mikkango, North Garo Hills a•jani Reking songo St Andrew’s Secondary School Block-ni gital nokko nokdonggae on•angani somoio a•dokni Chief Minister, jinmana aganprakatengon, mikkang bilsio Meghalaya a•dokni bilsi 50 gapaniko manianiona a•songni Prime Minister Narendra Modi-koba okamataha ine parakataha.
A•doko lekka porako tang•doatna gita a•dok sorkari, gisik on•batengani gimin elementary, secondary aro college-rango skie ra•ani bewalko nambatatna gita bang•bea tangka paisarangko chamaha ineba Chief Minister parakataha.
Williamnagar aro Baghmara college-na MDA sorkari, gong kror 12 ka•e tangka paisarangko chame on•manaha aro ia college-rangko mikkang bilsio matchotgen ineba ia tom•anio Chief Minister parakataha.
Chief Minister-ni parakatani gitade, East Garo Hills a•jani Rongjeng-o rikenggipa model college-koba da•o matchotangengaha aro ia college-koba mikkang bilsio, a•dokni bilsi 50 gapaniko manianio kulie on•anggnok.
Secondary aro higher secondary gadango pass ka•anirang komiengani giminba ua an•tangni suk ong•gijaniko parakangaha aro a•doko lekka porani gadangko nambatatna gita sorkari, dingtang dingtang dolrang baksa nangrime kamko ka•enga ine aganaha.
