Shillong, Dec 22: Mongolbar salni bako Meghalaya Livestock Entreprise Advancement Society (M-LEADS)-ni program-ko Shillong-ni State Convention Centre-o ong·atangenba, Meghalaya Piggery Mission-ni ning·o dingtang dingtang cooperative society aro IVCS-rangna cheque-rangko suale on·ataha.
Meghalaya a·doko wak be·enko chu·onga gita man·jaengani a·sel gipin a·dokrangonikosa brebana nangengani gimin a·doko chu·onga gita wak be·enrangko man·na aro wak jile cha·enggipa nokdangrangni janggi tangani gadangko tang·doatna gita ia Meghalaya Piggery Mission-ko Meghalaya sorkari a·bachengatahachim ine nikna man·a.
Ia program-ko ong·atanio Meghalaya a·dokni Chief Minister Conrad K Sangma, video conferencing gita aganprakatengon, ia mission ba kamara a·doko songdongenggipa manderangna nangchongmotgipa kam ong·enga ine nikenba a·dok sorkari ia mission-ko chu·sokgipa ong·atna rakbee kamrangko ka·aha ine parakatenba, ia mission-ko chu·sokatanio bakrimaniko on·ahani gimin dingtang dingtang dolrangkoba mittelpilangaha.
Chief Minister-ni aganani gitade, Meghalaya a·doko wakrang chu·ongjaengani gimin gipin biaprangonikosa brebaengani a·sel tangka paisarangko gipin a·dokrangonasa on·atna nangengachim aro da·o ia piggery mission-ko a·bachengatanichi a·doko wakrangni chu·onggijaniko bewalan namatna gita man·gnok.
Ia piggery mission-ni scheme-ko ra·e an·tangtangni namgnina jakkalchina gitaba a·doko songdongenggipa manderangko aro dingtang dingtang cooperative society-rangko Chief Minister didiangaha.
Ia program-ko ong·atanio a·dokni Deputy Chief Minister Prestone Tynsong-ba dongpae a·dokni seokgimin dingtang dingtang cooperative society-rangna ia mission-ni cheque-rangko suale on·angaha.
—
