Shillong, July 1: Meghalaya a•doko gital rimnapako man•gipa Meghalaya Civil Service (MCS) officer-rangko miksongani gnang, a•dokni namroro silroroanina aro dal•roroanina an•tangtangko on•kange kam ka•china Meghalaya a•dokni Chief Minister Conrad K Sangma didiangaha.
“Na•simang an•tangtangni kamrangko a•bachengengon, miksonganina gnangsa manderangna dangdike on•na gita an•tangtangni daitorangko jako ra•bo,” ine Sangma, Bristibar salo a•dokni sak 38 gital MCS officer-rangko rimnapna gita Shillong songjinmani Mawdiangdiang-o donggipa Meghalaya Administrative Training Institute (MATI)-o tom•aniko ong•atanio aganaha.
Gital MCS officer-rangna didiani kattarangko aganangkuengon, mikkangchi uamangni dakna nanggni kam aro daitorangni giminba Chief Minister talate on•angaha.
“Nang•ni kaman pring 9 bajioni attam 5 bajiona office-o asonge file-rangko clear ka•ani aro scheme-rangko sanction ka•anisan ine na•a chanchienga ong•ode uan nang•ni chu•gimik daito ong•jaenga aro nang•ni civil service-ni kamna miksongani ong•jaenga,” ine Sangma aganaha.
Kakket aro mikkim gnang a•dokna aro a•dokni manderangna dangdike on•china gitaba ua gital MCS officer-rangko didiangaha.
Kamtango pangnan gisiko nangchina didiangengon, officer sakantian songsalna dangdike on•na gita ka•oksiani gnangsa kamko ka•na nanga aro a•dokna dingtanganiko aro namroro silroroaniko ra•bana nanga ine Chief Minister parakataha.
“An•chingni miksonganian a•dokko mikkangchi nambatatanisa ong•na nanga aro an•chingni miksonganiranga songsalo pilakni gitan namroro silroroaniko ra•baanisa ong•na nanga,” ine Sangma aganaha.
Officer-rangni mikkangchi chagrongna sienggipa neng•nikani aro ra•bianirangni bidingo janapatskaengon, officer sakantian iandakgipa ra•bianirangko mikkangpana gita an•tangtangni changa sapani aro u•i-ma•sianirangko jakkalna nanga aro a•dokna dangdike on•anio pangnan cholrangko mesoke on•na nanga ine Chief Minister parakataha.
Neng•nikanirangko chagrongna nangani somoirangoba pangnan bamgipa aro manderangna nama bewalko mesokgipa ong•china gitaba ua gital MCS officer-rangko didiangaha.
Ia 2021 batch-chi gital MCS officer-rang, jadokna MATI-o administrative training-ko ra•anggnok.
Gital MCS officer-rangni ku•mikchetaniko a•dokni Additional Chief Secretary aro MATI-ni Director General Rebecca V Suchiang dilangskaaha.
