Shillong, Mar 16: Meghalaya a•dokni gitcham minister aro Rambrai constituency-ni gitcham MLA Nehlang Lyngdoh, National People’s Party (NPP)-o napangaha aro uko Budbar salo, Meghalaya a•dokni Chief Minister aro NPP-ni national president Conrad K Sangma baksana NPP-ni national vice president Prestone Tynsong aro gipin dilgiparang, Shillong-ni NPP office-o rimchaksoaha.Lyngdoh-ko NPP-ona rimchaksoani somoio NPP-ni national president Conrad Sangma, jinmana aganprakengon, Nehlang gita dakgipa dilgiparangni NPP-o napaniara manderangni NPP-o ka•donganiko mesokani ong•aha ine parakangaha.Gitcham sorkarirangni galchipe dongipa dingtang dingtang kamrang, jekai sima jolrango songdongenggipa manderangni neng•nikani, niam gri koela badingani aro uandakgipa dingtang dingtang neng•nikanirangko namatna NPP-chi dilenggipa sorkari kam ka•enga ineba Sangma aganaha.

NPP dolara manderangni ku•rangko knachakgipa dol ong•a ine janapatengon, uamang pangnan manderangni nanganikosa mikkango done kamko ka•enggipa dol ong•a ine NPP-ni national president parakataha.