Shillong, Apr 8: Ru•uta salrangna sae dongani ja•man, Meghalaya a•dokni gitcham Rajya Sabha MP Robert Kharshiing, Bristibar pringo Shillong songjinmani Nazareth Hospital-o a•gilsakko watangaha.
Bilsi 63 ong•gipa Robert Kharshiing, ru•uta somoirangna sae dongani ja•man, an•tangni jikgipa Nune Grigoryan, nogipa Agnes Kharshiing, an•tangni jonggipa sakgittam, chong•motan John F Kharshiing, Francis Kharshiing aro Michael Kharshiing baksana an•tangni gritang aro namchiktangrangko wate re•angsoaha.
Ua 2002 bilsioni 2008 bilsiona a•dokni Rajya Sabha MP ong•angaha aro 1990 bilsio Laitumkhrah constituency-ni bye-election-ko ong•atanioba MLA-na seokako man•ahachim.
Uni Rajya Sabha MP ong•engmiting somoio Robert Kharshiing, a•dokni nangchongmotgipa kamrangni bidingo ma•mong sorkarina ku•rangko on•ahachim.
Robert Kharshiing, saksa skigipaba ong•achim aro 1981 bilsioni 1984 bilsiona kingking Khasi Students Union (KSU)-niba president ong•ahachim.
Laitumkhrah Dorbar Shnong-niba ua saksa dilgipa ong•e kamko ka•ahachim.
