Shillong, May 4: Meghalaya a•dokni Dawki-o gital rikgipa Land Port-ko Bristibar salo, Home Affairs-ni Union Minister of State Nityanand Rai, a•bachengate on•angaha aro ia Land Port-ko a•bachengatanichi da•o India aro Bangladesh a•songrangni gisepo bading chiwalgrikaniko tang•doatgnok ine ka•dongsona man•enga.
Ian Meghalaya a•dokni skanggipa Land Port ong•enga aro iako Shillong songjinmaoni kilometer 84-mang chel•ao donggipa India aro Bangladesh a•songni simao rikaha.
Ia Land Port-ko a•bachengate on•anganio Meghalaya a•dokni Deputy Chief Minister Sniawbhalang Dhar, India a•songni Bangladesh-na High Commissioner aro gipin official-rangba dongpae bak ra•angaha.
Ia Land Port-ko kulianichi a•song damgnini simarango manderang re•rurana aro ma•manti bosturangko salrurana dakchakani ong•e ian a•song damgnini gisepo bading chiwalgrikaniko tang•doatna dakchakani ong•gnok.
Dawki-o ia acre 23 ong•gipa Land Port-na ma•mong sorkari 2016 bilsion ra•chakahachim aro ian National Highway 206 aro Asian Highway-I baksana nangdimatako man•gipaba ong•a.
