Shillong, June 5: A·songna chelchake janggitangko on·kanggipa India a·song gimikoni sipairangko Sombar salo, Meghalaya-ni skotong minister Pa Conrad K Sangma, New Delhi-ni Chanakyapuri-o donggipa National Police Memorial-o mande ra·aniko dakangaha.

New Delhi-china doange sipairangko mande ra·angani somoio jachipchange ra·gipa noksarangko uni official Twitter account-o watdoatenba, India a·songo pilak jatrangni gisepo meli-nangrime donganiko chelchakani somoio janggi tangtangko on·kange sianggipa sipairangko chinga mande ra·bean baksa salam ka·a ine skotong minister see parakataha.

National Police Memorial-ni wall of valour ba pakmani rong·plengo a·songtangna janggitangko on·chake sianggipa sipairangko see donenggipao an·chingoni kamtangko ka·engmiting somoio sianggipa Meghalaya police-oni sipairangni bimingba dongpaaniko nike namen rasong chaa aro uamangkoba dingtangmancha mande ra·a ine skotong minister parakatjolaha.