Shillong, July 30: Meghalaya a·doko bading chiwalaniko tang·doatna gita Sukrobar salo, Meghalaya State Investment Promotion Society (MSIP), India sorkarini Commerce & Industry Ministry-ni ning·o donggipa Invest India baksa Memorandum of Understanding (MoU)-o soi ka·grikaha aro MoU-o soi ka·grikani somoio a·dokni Chief Minister Conrad K Sangma, Chief Minister-ni advisor Thomas A Sangma aro a·dok sorkarini Chief Whip Marcuise Marak-ba dongpae bak ra·angaha.

New Delhi-o soi ka·grikani ja·man talataniko on·angengon, Meghalaya a·doko bading chiwalaniko aro karkanarangko tang·doatna gita invest ka·ani cholrangko on·na ia MoU-o soi ka·grikaha ine a·dokni Chief Minister Conrad Sangma parakataha.

“Short term aro long term minggninan chinga nisanko dongen aro ian a·doko One Product-One District Program-ko tang·doatan baksana bading chiwalani bewalrangkoba namdapatna dakchakani ong·gen,” ineba Sangma aganaha.

Samba jolo donggipa a·songrang baksa bading chiwalgrikaniko namdapatani giminba Chief Minister aganaha.

“Global Value Chain-na tarisoanio Invest India dol dakchakanirangko on·gen aro chinga skanggipa Lakadong holdi, Eri kilding, me·gimu, anaros aro te·brongrangoniko tarigipa bosturangko tang·doatna ja·kuko de·chenggen,” ine Chief Minister aganaha.

Indake ong·engon, Lakadong holdi-ko watna gita market linkage-ko tarichengenba Ri Bhoi a·jani anaros aro bija bitchirangkoba gipin a·songrangona watatna gita uamangni salgro salaramo donggipa office baksa kamrangko a·bachengataha ine Invest India-ni Managing Director aro CEO D Bagla parakataha.