Shillong, Aug 9: Meghalaya a•doko bading chiwalani kamrango gisik nanggipa manderangna dakchakanirangko on•na gitasa MDA sorkari, Promotion & Incubation of Market Driven Entreprise (PRIME) program-ko 2019 bilsio a•bachengataha ine Sombar salo a•dokni Chief Minister Conrad K Sangma parakataha.
Sombar salo, CM’s E-Championship 2020-ni graduation ceremony aro 2021 bilsini Cohort-2 batch-na boarding ceremony-ko ong•atanio jinmana aganprakangengon, “Meghalaya a•doko bading chiwalaniko tang•doatna aro bading chiwale cha•enggiparangna cholrangko on•na nangnikenga ine nike sorkari, ia PRIME program-ko a•bachengatna manchiaha,” ine Chief Minister parakataha.
Chief Minister-ni aganani gitade, bading chiwalgiparangni kamrangko ka•anio dingtang dingtang ra•biani aro neng•nikanirangko mikkangpana man•na gita sorkari, ia PRIME program-chi bading chiwalgiparangna dakchakanirangko on•enga.
E-Championship Conclave-o bakko ra•giparangna aganprakangskaengon, 1990 bilsirangni bon•angachibara ua an•tangni IT-ni kamrango bading chiwalgipa ong•e kam ka•e nikani gimin talataniko on•angskaaha.
“An•ching je kamko ka•engoba ua kamna gisiko nanggiparang aro miksongani donggipa ong•na nangchongmota. Anga an•tangan bading chiwalani kamrango ra•bianirangko nikmangimin ong•e a•doko bading chiwalaniko tang•doatna gisiko skaniba dongaha,” ine Sangma aganaha.
Bosturangko tarigiparangsan ong•aijachina gita bading chiwalgiparangko didiangengon, bading chiwalanio chu•sokgipa ong•na gitade damni kri chu•gimik cholrangba dongna nanggen ine Chief Minister parakataha.
Ia program-ko ong•atanio dingtangmancha PRIME-ni annual booklet aro PRIME ID-koba oprake on•angjolaha aro ja•mano Chief Minister-ni jakchi, ia program-o bak ra•gipa chadamberangna cheque aro certificate-rangko on•angjolaha.
