Shillong, March 3: Meghalaya a•doko bijoliko chu•onga gita man•jaengani a•sel bijoliko kimitna nangtaiengahani gimin da•al Budbar salni bako, Meghalaya a•dokni Power Minister James PK Sangma, ma•mongni Union Power Minister Raj Kumar Singh-ko grongeaha.
Union Power Minister-ko gronge agangrikengon, adita salrangna skang NTPC, Letter of Credit-ko a•dokna on•ate NERLDC gita Short Term Open Access (STOA)-ko champengatahani a•sel Meghalaya a•doko bijoliko chu•onga gita man•jaenga ine Sangma agan-talate on•angaha.
Atma Nirbhar Bharat scheme-ni gong kror 1,345 tangkarangko ra•sroenba, bijolina gro dongkuenggiparangko gamna gita Meghalaya sorkari ku•rachakmanaha aro NTPC-na gro dongkuenggipa gong kror 630-oni gong kror 100-ko chotna miksongenga ineba ia tom•anio a•dokni Power Minister, Union Minister-na talate on•angaha.
Indake ong•engon, Meghalaya a•doko bijoliko chu•onga gita man•piltaina ta•raken dakchakaniko on•china gitaba Sangma, Union Power Minister-ko didiangaha.
Meghalaya a•doko chu•onga gita bijoliko man•jaengani gimin a•dokni pilak biaprangon bijoliko somoi gita kimitna a•bachengtaiaha ine nikna man•enga.
