Dalu, Feb 17: Meghalaya a•doko Bharatiya Janata Party (BJP)-ko seoke sorkari rikna cholko on•genchimode, a•doko tangka paisarangko jakkalsreta ine matnangenggipani bidingo, kamoni neng•takgimin Supreme Court-ni judge-chi inquiry-ko dakatgen ine Sukrobar salo Union Home Minister Amit Shah, West Garo Hills a•jani Dalu constituency-o ku•rachakaniko on•angaha.
Meghalaya a•doko tangka paisarangko jakkalsretaha ine gitcham sorkarirangko matnangatengon, batanggimin somoirango Mukul aro Conrad sakgnian Sangma-rang ong•genchimoba, a•doko maming namroro silroroaniko nikna man•jaha ine Shah parakataha.
“Meghalaya a•dokko Sangma-rangan sason ka•ahachim indiba maming namroro silroroanirang dongjaha. Indita bilsirangna uamang maiko dakaha? Uni gimin kangal cholgrirangna ma•mong sorkarini watatenggipa tangka paisarangko jakkalsretna man•jana gita a•dokko jakgitel ong•ata nangengaha,” ine ua aganaha.
Batanggimin bilsisnina baten BJP-ni ning•o Assam a•dokna bang•en namroro silroroani kamrangko ra•baaha ine janapatengon, Assam-o iandake namroro silroroaniko nikna man•aniara ma•mong sorkarini ra•gate on•enggipa scheme-rangni a•selsa ong•enga ine Union Home Minister parakataha.
