Shillong, June 18: Batanggimin jagni salbongani gisepon, Meghalaya a·dokni dingtang dingtang biaprango chi bananirangchi aro a·arang rurongdapanichi gimik sak 30 manderang siangna gita nangaha.
Batanggimin bilsirangona bate ia bilsio Meghalaya a·dok gimikon mikkarang jimbate waenga aro uandaken chi bananirangchi aro a·arang ruronganichi manderangni sianirangko, bagan barirangni nosto ong·anirangko aro rama jal·langrangni nosto ong·anirangko bang·en nikna man·engahachim.
Ia 2022 bilsini April 1 tarikoni June 17 tarikona sorkarini see rakkianiko parakani gitade, a·dokni dingtang dingtang biaprango gimik sak 24 manderang siangna gita nangaha aro ia sak 24-oni sak 17-de East Khasi Hills a·jani Mawkynrew block, Mawphlang block aro Dangar-Mawsynram block-rango a·arang rurongdapanichi sianggiparang ong·achim.
Ri Bhoi a·jaoba, May jani 13 tariko Panitola songo bol pangsa autorickshaw gariko be·dapanichi, mande saksa so·otako man·aha aro sakbri manderang saknaanirangko man·skana nangahachim.
West Garo Hills a·jaoba, re·anggipa June-ni 9 tariko Gambegre C&RD Block-ni ning·o donggipa Jebalgre songo a·a rurongdapa man·e sakgittam manderang siangna gita nangaha aro una skang, April-ni 23 tarikoba, Rongram block-ni ning·o donggipa Kongbe chiringo bilsi 9 ong·gipa me·a bi·sa saksa sripe siangahachim.
South Garo Hills a·jaoba June-ni 17 tariko a·arang rurongdapa man·e biap damgnio gimik sakbri manderang siangna gita nangaha aro una skang, April-ni 19 tarikoba Baghmara block-o mande saksa sripe sina gita nangahachim.
South West Garo Hills a·jaoba June-ni 9 tariko Betasing C&RD Block-o a·a rurongdapa man·e me·a bi·sa saksa siangna gita nangaha aro una skang April-ni 5 tariko, Rerapara aro Betasing block-o mikka balwa ta·rakange mande saksa siangna gita nangahachim.
West Jaintia Hills a·jaoba, re·anggipa May jani 9 tariko, Jowai-ni Ladthadlaboh-o bol pangsa PWD South quarter te·sako be·dapanio mande saksa siangna gita nangaha.
