Shillong, April 19: Meghalaya a•doko COVID-19 giprorotaiengahani gimin sabisini giproroaniko champengna gita Sombar salo, Meghalaya a•dokni Chief Minister Conrad K Sangma-ni dilanichi, dingtangmancha tom•aniko ong•atenba adita niamrangko taridapangaha aro ia tom•anio a•dokni cabinet minister aro Health department-ni official-rangba dongpae bak ra•angaha.
Meghalaya a•doko COVID-19-ni giproroaniko champengna niamrangko taridapangengon, gipin a•dokrangoni Meghalaya a•dokona re•baenggipa manderangko April 23 tarikoni sal 14-na champengatchengna gita sorkari manchie donangaha. Gipin a•dokrangoni re•baenggipa manderangko champengatengoba joltangoni tourist ba rona re•baenggipa manderangde, mitam tourist spot-rangko niena ba roena man•aigen indiba ia biaprangko joltangtangni DC-rang tik ka•anggen ine u•iataha.
Ia champengataniara mongsongbate Shillong songjinmani wilwilaosan ong•kuaigen ineba u•iataha.
“Je biaprangon COVID-19 giprorona krabata, uandakgipa manderangni rochakgipa biaprangko sandie, nanga gita champenganirangko dakchina sorkari, Deputy Commission-na bilko on•manaha. Manderangni rochakgipa biaprango manderang agre bang•e rona man•jana gita sorkari niamrangko donatgen,” ine tom•a matchotani ja•mano a•dokni Chief Minister Conrad Sangma parakataha.
Meghalaya a•dokni private office-rango kam ka•giparang bak 10-oni bak 5-na bate kamko ka•jachina gitaba sorkari niamko donataha.
“Je manderangan noktangtangoni kamko ka•na man•na, uandakgipa manderangkode sorkari noktangtangonin kamko ka•china didienga. Apsan daken sorkari office-rangnaba chinga apsan niamko donataha. Sorkari office-rango kam ka•giparang apchangket ong•jachina gita bak 10-oni bak 5 dake kam ka•giparangko kam ka•atchina chinga niamko donataha indiba bank, post office aro ma•mongni gipin office-rangde bak 10-oni bak 10 daken kamko ka•angna man•aigen,” ine Chief Minister parakataha.
Chief Minister-ni u•iatani gitade, da•o dipet dokkanrangkode kulina man•aikugen indiba sorkarini dongimin niamrangko ja•rike dokkanrangko kuliskana nanggen. Dokkanrango sorkarini dongimin niamrangko ja•rikjagenchimode dokkanrangko chipchina ge•etaniko on•gen.
Indake ong•engon, Shillong songjinmao Nursery-oni Class 12-ona pilak skulrangkon Mongolbar saloni a•bachenge sal 14-na chipe donanggen aro skulrangko May jani 4 tariko kulipiltaigen ineba Chief Minister parakataha.
MBOSE-ni ong•atenggipa SSLC aro HSSLC porikkarangkode donsogimin gitan ong•atangkuaigen.
Hotel, Restaurant aro uandakgipa cha dokkanrangko kuliani bidingo janapatengon, iandakgipa hotel ba restaurant-rango bak 10-oni bak 5-ni gitasan manderang napna man•aigen aro ia niamko ja•rikjagenchimode chipchina ge•etaniko on•gen ine Chief Minister parakataha.
Shillong songjinmao jinma tom•bimonganirangkoba champengataha indiba niamrangko ja•rike bia ka•ani, mande siani aro uandakgipa tom•anirangkode ong•atna man•aigen.
RTPCR test-ni gimin janapatengon, ia porikka ra•ani skango konta 72-na choligipa ong•genchimoba da•o konta 48-nasan choligipa ong•aignok ine Chief Minister parakataha.
Manderangna neng•nikanirangko on•jana gita sorkari chu•gimik lockdown-kode a•doko ra•gatna nangnikkujaenga ine talatangengon, COVID-19-ni giproroaniko champengna gita a•doko songdongenggipa mande sakantikon sorkarini dongimin niamrangko rake ja•rikchina gita Chief Minister didiataha.
