Shillong, April 6: Meghalaya a·dokoba COVID-19-ko man·giparang da·o sak 100 batangtaiengahani gimin an·tangtangko simsake dongchina aro sorkarini dongimin niamrangko ja·rikjringchina gita sorkari, a·doko songdongenggipa manderangko didiataha.
A·songni gipin biaprango gitan Meghalaya a·dokoba COVID-19-ko man·gipa manderang batrorobataiengaha aro sabisirang giprorotaiahaode sorkari lockdown-ko ra·gattaina nangao ga·akgnok ine Meghalaya a·dokni Health Minister AL Hek parakataha.
Union Health Minister Harshvardhan baksa video conference gita tom·e chanchirimani bidingo talatangengon, internet gita sabisiko am·sandigipa kol Integrated Disease Surveillance Project (IDSP)-ko sorkari a·bachengataha ine Hek parakataha.
Gipin biaprangoni manderang a·dokona re·baengani gimin a·doko COVID-19 giprorotaina a·bachengengaha ine talatangengon, manderang an·tangtangan simsake dongjagenchimode skango gitan da·oba a·doko COVID-19 giptaignok ine a·dokni Health Minister mikrakataniko on·angaha.
“An·chingni a·dokoba da·o rang·san sabisiko man·giparang bang·barorotaiengaha aro an·ching an·tangtangko simsake rakkijagenchimode sabisiko man·giparang batroroangkugen. Sabisi giproroaniko sorkari champengna man·jagenchimode lockdown-ko ra·gattaiana agre gipin chol dongjawaha,” ine a·dokni Health Minister mikrakataniko on·angaha.
Sombar salni 1:00 bajiona kingking Meghalaya a·doko COVID-19-ko man·giparang gimik sak 102 gaptaiahachim ine nikna man·a.
