Shillong, May 6: Batanggimin bilsisana COVID-19-ni giproroaniko nikna man•ahaoba aro dingtang dingtang sanna banani cholrangna gong kror 400-500 tangkarangko koros ka•ani ja•manoba Meghalaya a•doko COVID-19-ni giproroaniko champengna man•jaengani gimin Bristibar salo, Congress dolni MLA Mohendro Rapsang, a•dok sorkariko matnangataha.
Batanggimin bilsisani gisepon indita tangka paisarangko maio koros ka•aha ineba ua a•dok sorkariko sing•doangaha.
“Sabisini giproroaniko champengna tarisomanaha ine sorkari aganronga indiba da•o ong•enggipa obostarangko nigenchimode uamang maming tarisamsoanirang dongja gita nika,” ine Rapsang parakataha.
Gong kror 400-500 tangkarangchi COVID-19 hospital-rangkon rikna man•pilgnokchim ineba Congress MLA matnangataha.
Meghalaya a•doko COVID-19 man•giparang batroroengahani gimin hospital-rango gipin sagiparangkode nina man•piljawaha ineba Rapsang, an•tangni suk ong•gijaniko parakataha.
Budbar attam dipet East Khasi Hills a•jao rang•gitik lockdown ra•gatanikoba ua raken jegalataha aro lockdown ra•gatna skang manderangna somoiko on•chengna nangachim ine parakataha.
Rapsang-ni parakatani gitade, uni constituency-o bang•a manderangan salo hajira ka•e cha•giparangsa ong•achim aro Budbar attam dipet rang•gitik lockdown-ko ra•gatani a•sel ia manderang neng•nikanirangko chagrongna nangtokengahachim.
Meghalaya a•doko ta•raken COVID-19 giproroengahani gimin sorkari, re•anggipa Budbar attam dipet East Khasi Hills a•jao lockdown-ko ra•gatangahachim.
