Shillong, June 12: Meghalaya a•doko drugs ba pekatgipa samrangko jakkalani aro niam gri badinganirang batroroengani gimin drugs jakkalani aro badinganiko champengna gita Sombar salo, Meghalaya a•dokni Social Welfare Minister Paul Lyngdoh, Police department aro gipin department-ni official-rang baksa tom•aniko ong•atangenba, advisory board-ko songe donangaha.
Ia tom•aniko ong•atani bidingo kobor ra•timgiparangna talataniko on•angengon, High Court-ni gitcham Judge, Justice Shivaji Pandey, ia advisory board-ni chairman ong•e kamko ka•na ku•chakmanaha aro ua chairman-ni kamko jako ra•ahaon, Prevention of Illicit Traffic in Narcotic Drugs & Psychotropic Substances (PITNDPS) Act 1988-ko a•dok sorkari ra•gatna man•gnok ine Lyngdoh parakataha.
Ia PITNDPS Act 1988-ni bidingo talataniko on•angengon, ia niamni ning•o niam gri sam badinggipa manderangko skanggipao jagittamna pattoko done ja•mano uko bilsisaona bariatna gita man•gen ine Social Welfare Minister parakataha.
Meghalaya a•doko drugs jakkalanirang bilongbatenggipa damsni a•jarangko uamang seokmanaha ineba Lyngdoh parakataha.
Re•anggipa bilsio a•bachengatgipa Drug Reduction Elimination & Action Mission (DREAM) project-ni gimin janapatskaengon, ia project-ni ning•o uamang draft policy-ko ra•chakaha aro Meghalaya a•dokko pekatgipa samrangoni jakgitel ong•atna gita dingtang dingtang department-rang baksa bakrime kamko ka•anio mission director aro uni dolan sorkarina dakchakanirangko on•gen ine Social Welfare Minister parakataha.
DREAM project-ni ning•o awareness program aro uandakgipa dingtang dingtang program-rangko ong•atna gong crore 5 tangkarangko chame donataha ineba Lyngdoh parakataha.
