Shillong, Nov 19: Gipin biaprangchi niam gri napdrabagiparangko champengsona gita Meghalalya a·doko Inner Line Permit (ILP)ko gong·raken ra·gatchina Ma·mong sorkariko su·dodoangtaina mikkang November 27 tarikoni a·bachenge dingtang dingtang programrangko ong·ate jingjengataniko dakangtaina gita niam gri napdrabagiparangni kosako ong·enggipa Confederation of Meghalaya Social Organizations (CoMSO), mija Butbar salo parakataha.
A·dokni pilak district ge·antini skotongrango mikkang November 27 tariko gisim nisanrangko songdoe jingjengataniko dakangna aro re·baenggipa December 4 tariko asonge jegalanirangko dakangtaina gita tom·anio jinmaan namnike ra·chakangaha ine confederation-ni chairman, Robertjune Kharjahrin u·iataha.
“Meghalaya a·dok gimikon Inner Line Permit-ko bakbakan ra·gatchina gita chinga ma·mong sorkario dabia aro apsandake mija mangmango a·dokni Governor-ni watpilatgipa Mehalaya Residents, Safety and Security (Amendment) Bill, 2020-ko ra·bapiltaichina gita a·dok sorkario dabia,” ine ua aganaha.
Niam gri napdrabagiparangko champengsona man·gnigipa bilakgipa niamko ru·uta bilsirangoni a·dokni manderangni nangnikenggipako chu·sokatna gita mija bilsi December jao State Legislative Assembly-o jinmani ra·chakanggipako ma·mong sorkari man-ra·na nanga ine Hynniewtrep Youth Council (HYC)niba padot ong·enggipa, Kharjahrin agandapaha.
“ILP-ko Meghalaya a·doko ra·gatna ja·manchakenganiara, mija bilsi Assembly-o jinmani ra·chakanggiminko che·em-che·em poraie nikujani giminde ong·ja, indiba political-ni gita maming gisiko nanganirang dongjani a·selsa ong·a,” ine ua aganaha.
Salgro-salaram a·jolni gipin a·dokrango ILP-chi uamangni dingtangmanchagipa ong·aniko chelchakna bilrangko man·ode, maini gimin Meghalaya-ni tribal manderangnaba ia apsan bilrangko on·na man·ja, ine ua sing·doaha.
Indake ong·engon, a·doko ILP-ko gong·raken ra·gatangchina gita a·dokni sak 60 MLA-rangko aro a·dok sorkariko amadipet ma·mong sorkariko jetjetchina gitaba CoMSO dabiangjolaha.
