Shillong, July 12: Ia sal somoirango chadamberang kamrangko ka·e cha·na kamrangko man·angjaengahani gimin kamna galenggipa candidate-rangna sorkarini dongimin upper age limit ba dongimin bilsiko 42-ona ra·doatchina gita Hynniewtrep Integrated Territorial Organisation (HITO) dabiangaha.
Iani bidingo HITO-ni dilgiparang, Sombar salo Meghalaya a·dokni Chief Minister Conrad K Sangma-ko gronge agangrikaha aro chief minister-ko grongani ja·mano kobor ra·timgipa manderang baksa agangrikengon, ia sal somoirango dingtang dingtang competitive porikkarangko seachiba kamrangko man·na neng·engahani gimin a·dokni chadamberangna upper age limit-ko bariatskana nangengaha ine HITO-ni president Donbok Dkhar parakataha.
Da·o dipet Meghalaya a·dokni ST/SC-rangna sorkarini kamrangna dongimin bilsiara 32 ong·engachim aro ia bilsi 32-ko 42-ona ra·doatskachina HITO dabiangaha.
Iani bidingo a·dokni Chief Minister, committee baksa agangrike cholrangko sandina ku·rachakataha ineba HITO-ni president parakataha.
“Chinga bilsiko 42-ona bariatchina Chief Minister-o dabiahachim indiba ua bilsi 42-onade bariatna man·janaba gnang indiba bilsi 37-ona bariatskana gita cholrangko nina ku·rachakataha,” ine Dkhar aganaha.
