Shillong, Mar 21: India a•songo micro, small & mid-sized entreprise (MSME)-rangko tang•doatna kam ka•enggipa Laghu Udyog Bharati-ni bipek ba unit-ko Meghalaya a•dokoba Sombar salo, Shillong Club Residential-o songe donangaha.
Ia Laghu Udyog Bharati (LUB) Meghalaya unit-ko dilna gita Vikram Singhania-ko president-na aro Harsh Jhunjhunwala-ko general secretary-na seoke donangjolaha.
LUB Meghalaya unit-ko songe on•angani somoio LUB-ni gitcham president aro North East India-ni in-charge Om Prakash Mittal, jinmana aganprakengon, India a•songni dam 500 a•jarangona baten LUB-ni bipekrang donga aro LUB-ni nikjumanganian a•gilsak gimiko India a•songko MSME-ni mongsonggipa biap ong•attaiani ong•enga ine parakangaha.
Ia tom•anio Organisation Minister Prakash Chand-ba dongpae jinmana aganprakengon, India a•songko agrarian economy ine chanengoba ian Industrial econony-sa ong•achim ine talataniko on•angaha. India a•songko a•gilsak gimikon ‘golden economy’ ine mingengon ‘One Family One Industry’ gitasa a•gilsakna dangdike on•enga ineba ua aganaha.
