Shillong, Oct 3: Meghalaya a•doko legal scientific mining ba niamo pangchake koelarangko bikotna gita kamrangko a•bachengengaha aro sak 15-oni sak 18-mangni gitade koelarangko bikotna Prospecting Licence-rangko man•soaha ine a•dokni Chief Minister Conrad K Sangma parakataha.
Iani bidingo kobor ra•timgipa manderang baksa agangrikengon, koela bikotgipa manderangoni bang•a manderangan prospecting licence-na dorgastorangko galaha aro mitamrangde licence-rangko man•soaha ine Sangma parakataha.
Licence man•gimin manderang mitamde an•tangtangni mining plan-rangko on•manaha aro uamangni mining plan-rangko ra•chakmanahaode koela bikotaniko a•bachengna man•gnok ineba Chief Minister parakataha.
2019 bilsini July jao Supreme Court-ni hukum on•anio pangchake Meghalaya sorkari, nanga gita ja•kurangko de•aha aro da•o koela bikotani licence-rangko bakan man•tokgnok ine sorkari ka•dongenga.
