Shillong, June 15: Meghalaya a·dokni police dolrango sipairangko rimdape aro gipin cholrangko namdapate sipai dolrangko bilakdapatani bidingo chanchirimna gita Mongolbar salo a·dokni Chief Minister Conrad K Sangma, dingtangmancha police official-rang baksa tom·aniko ong·atangaha.
Tom·a matchotani ja·mano kobor ra·timgiparangna talatangengon, Meghalaya a·doko police-rangni dingtang dingtang biaprangko, kam ka·ani bewalrangko aro kam ka·giparangko rimdapanichi police dolrangko bilakdapatna nangenga ine Chief Minister parakataha.
Kenchakna nangbatgipa biaprango police outpost-rangko songani aro bang·bata a·jarangon police station/outpost-rangko nambatatna gita sipairangko rimdapani bidingoba ia tom·anio chanchirimangaha.
Police dolrangko bilakdapatna gita ja·kurangko de·engon, tangka paisani gita bilakanikoba nie kamko ka·na nanggen ineba Chief Minister aganaha.
Ma·mong sorkarini ra·chakgimin Meghalaya Police-ni 7th aro 8th battalion-rangni gimin sing·on, ia battalion-rangko chalaianio ma·mong sorkaride adita bakrangkosan dakchakaigen aro bilsisamangni gisepon chu·gimik tangka paisarangko a·dok sorkarisa koros ka·na nanggen ine Chief Minister parakataha.
Da·o mikkang bilsi 20-oni bilsi 30-mangona korosrangko nisamsoesa sorkari, da·o ong·enggipa outpost-rangko namdapatchenggenma ma gital battalion-rangko kulichenggen ukode chanchianggen ineba Chief Minister parakataha.
