Shillong, Sep 16: Meghalaya a•dokna on•enggipa railway project-rangko chu•sokatchina ma•mong sorkari ge•etenga ine Sukrobar salo, Meghalaya a•dokni Chief Minister Conrad K Sangma parakataha.
Sukrobar salo, railway project-rangni gimin Assembly-o sing•anirangna iako a•dokni Chief Minister Conrad K Sangma aro Transport Minister Dasakhiat Lamare parakataha.
Meghalaya a•doko km 22 ong•gipa Tetelia-Byrnihat rel rama aro km 108 ong•gipa Byrnihat-Shillong rel ramarangko tarichina ma•mong sorkari, railway project minggniko on•ahachim ine nikna man•a.
Tetelia-Byrnihat rel project-na gong crore 496 korosko hisape donmanahachim indiba a•doko dingtang dingtang dolrang jegaltokengani a•sel ia rel ramako tarina man•chipkujaengachim.
“Ia railway project-rangko chu•sokatchina ma•mong sorkari, a•dok sorkarina ge•etanirangko on•taitaienga indiba jadokna skang angni Union Railway Minister-ko grongeani somoio ia project-rangko chu•sokatanio chagrongna nangenggipa neng•nikanirangko anga talate on•aha. Ia rel ramarangko Meghalaya a•doko songdongenggipa manderangni namgninasa ra•gate on•engani gimin jensalo Meghalaya sorkari aro a•dokni manderang ia project-rangko ra•chakgen, ukosa kamrangko ka•gen ine ua angna aganatskaaha,” ine Sangma parakataha.
Chief Minister-ni parakatani gitade, dingtang dingtang dolrang aro a•dokni manderang baksa ia rel project-rangni gimin chanchirimchengani ja•manosa kamrangko ka•gen ineba ua ma•mong sorkarina u•iataha.
Tetelia-oni Byrnihat-ona rel ramako taribaanio Assam-chipaknide kamrang bewal matchotangaha indiba Meghalaya a•dokode kamrangko a•bachengatani somoion a•sel ong•changaha ineba ua aganaha.
Sangma-ni aganani gitade, Byrnihat-ona bostu salgipa rel garimangmangko ra•bana man•genchimoba a•dokni manderang bang•a namgnirangko man•gen ine ua mitam dolrang baksa agangrikahachim.
A•dokni manderangna ka•dongataniko on•na man•na gita Mendipathar railway station-o check point-ko songe on•china ua gitcham railway minister-ko didiatahachim ineba Chief Minister parakataha.
Meghalaya a•dokona niam gri napsrukanirangko champengna gita a•dok sorkari, taridapgimin Meghalaya Residents Safety & Security Act (MRSSA)-ko ra•bae on•an baksana a•doko Inner Line Permit (ILP)-ko ra•gatchina dingtangmancha resolution-koba pass ka•ahachim ineba Sangma aganaha.
