Shillong, July 16: Adita salrangna skang East Jaintia Hills a·jani Khliehriat Police Reserve-ko boma godapahani gimin mikkangchi iandakgipa so·sojengjeng ong·atani kamrangko chel·chakna gita sorkari, sipairangni nirikkie kam ka·aniko bilakbatataha ine Meghalaya a·dokni Chief Minister Conrad K Sangma parakataha.

Re·anggipa Budbar pringwalo, Khliehriat-o donggipa police reserve building-o ma·sina man·gijagipa manderang, IED bomako gopretahachim aro ia boma gopretanio police reserve-ni pakmarang nosto ka·ako man·ahachim.

Iandake bomarangko goe chadrapanina an·tangni suk ong·gijaniko parakatengon, mikkangchi iandake so·sojengjeng ong·atani kamrangko chel·chakna gita sipairang mikrakbate kamrangko ka·anggen ine Chief Minister parakataha.

Meghalaya a·doko bobil dake chakatgipa dolrang ka·sinsin nadobataengaha ine agananikoba Chief Minister raken jegalataha aro a·doko tom·tomaniko rakkiangna gita Meghalaya Police raken kamko ka·enga ine parakataha.

Hynniewtrep National Liberation Council (HNLC) bobil dol baksa tom·tomanina agangrikani gimin janapatengon, iani bidingo Meghalaya sorkari ma·mong baksa agangrikenga indiba HNLC bobil dol, so·sojengjeng ong·atani kamrangko watgalchenggenchimosa agangrikanirangkode dakna man·gen ine Chief Minister parakataha.