Shillong, May 8: Meghalaya a•doko songdongenggipa Manipur a•dokni Hmar aro gipin jatrang, Sombar salo, Meghalaya a•dokni Chief Minister Conrad K Sangma-ko grongenba, Meghalaya a•doko aro mongsongbate Shillong songjinmao tom•tomaniko rakkina gita dakchakanirangko on•china mol•molangaha.

Manipur a•doko neng•nikanirangko chagrongna nangengmiting somoirango Meghalaya a•doko songdongenggipa ia jatrangni nokdangrangko naljokaniona rimongkatanio dakchakanirangko on•china gitaba a•dokni Chief Minister-ko ia dilgiparang mol•molangaha.

NPP dolchipakniba Manipuri jatko dilenggiparang, Manipur-o ong•enggipa obostarangni bidingo dakchakanirangko on•china aro political dolni gadango ma•mongni dilgiparang baksa agangrikchina gita a•dokni Chief Minister-ko didiangaha.

Indake ong•engon, ua bakan New Delhi-ona re•ange Manipur a•doko ong•enggipa obostarangni bidingo ma•mong sorkari baksa agangrikegen ine NPP-ni national president aro Meghalaya a•dokni Chief Minister Conrad K Sangma, ku•rachakaniko on•ataha.