Shillong, June 4: Meghalaya a·dokni dingtang dingtang songrango pagitchamrangni dakbewal rikbewalo pangchake songo noko chalaiani bewalko niamo ra·gatna man·na gita committee-ko songe am·sandiatchina gita Shillong-ni Congress MP Vincent H Pala, a·songni Prime Minister Narendra Modi-na sedoataha.
Songo noko chalaiani bewalko niamo ra·gatengon, songni nokni namroro silroroanina jekai ma·mong sorkari tangka paisarangko chame on·engachim, apsan daken songko nokko chalaienggiparangnaba tangka paisarangko chame on·china gita Pala didiangaha.
“Village council-rangni dilgiparangko seokanio jatni daka rikani niamrangko dingtangatgija jekai ma·mong sorkari, songni nokni namroro silroroanina aro sorkariko chalaianina tangka paisarangko chame on·enga, apsan daken songko nokko chalaina gita niam aro tangka paisarangchi bilakataniko man·na commission-ko songe am·sandianiko dakchina anga PMO-ko mol·molenga,” ine Sukrobar salo, Prime Minister-na seatgipa chittio Pala parakataha.
Shillong MP-ni parakatani gitade, Meghalaya a·doko songko nokko re·dilenggipa dolrang jatni daka rikani niamrangchisa songko nokko chalaienga aro songni nokma ba gipin dilgiparangan, namroro silroroatani kamrang aro songsalni gipin kamrang baksana songni nokni neng·nikan somoirangoba bichal ka·timgipani kamkoba ka·a.
Meghalaya a·doko songko nokko chalaienggiparangba a·songni gipin biaprango donggipa Panchayati Raj gitan apsan ong·achim ine talatangengon, Meghalaya a·doko songko nokko chalaienggipa dolrangkode 73-gipa Amendment Act-oniko watchanggale a·songni gipin biaprango man·enga gita Finance Commission-ni ning·o tangka paisani gita dakchakanirangko man·pajaenga ine Shillong-ni Lok Sabha MP parakataha.
“Indake ong·genchimoba 2021 bilsioni 2026 bilsiona Meghalaya a·dokna 15th Finance Commission-ni ning·o tangka paisarangko chamaha. Uamang a·dok ba Council gita ma·mongoni chamatgipa tangka paisarangko changsano man·engoba jaantide dormaharangko man·skajaenga aro iani a·selan uamang kamtangtangko ka·anio neng·nikanirangko man·enga,” ine Pala parakataha.
