Shillong, Jan 9: Meghalaya a·doko BJP dolba, National People’s Party (NPP)-chi dilenggipa Meghalaya Democratic Alliance (MDA) sorkarini bak ong·paengoba a·dok sorkarini tangka jakkalsretanirangko champengna gita ja·ku de·angkugen ine BJP-ni state president Ernest Mawrie parakataha.
A·doko tangka jakkalsretaniko champengna gita sorkari, rakgipa ja·kurangko de·na nangchongmotenga ineba ua aganaha.
Mawrie-ni aganani gitade, a·doko tangka jakkalsretanirangko BJP nie dongchajawa ine uamang a·dokni Chief Minister Conrad Sangma-naba u·iatmanaha.
ILP gita dakgipa kamrangni giminba a·doko BJP dol ku·rangko on·enga aro a·doko songdongenggipa Tribal jatrangko chel·chakna gita a·doko aro ma·mongo BJP-ni dilgiparangba gisiko nange kam ka·enga ineba BJP-ni state president parakataha.
