Shillong, June 5: Samtangtango ong·telaigiparangko tangatpilna aro ripinge rakkina man·na gita ja·kurangko de·china, Meghalaya a·dokni Chief Minister Conrad K Sangma, pilakkon didiangaha. Sonibar salo ‘ecosystem restoration’ ine pangchakaniko done, World Environment Day-ko maniani salo ua internet gita jinmana aganprakatengon, da·o adita bilsirangni gisepon 500 square kilometre ong·gipa buring bolgrimko a·doko ong·atna gita ua an·tangba ku·rachakange, a·doko songdongenggipa mande sakantikoba didiangaha.
Onbatgipa gadangonin manderangna mikrakataniko on·na, dingtanganiko ra·bana gita sorkari aro songsalni gisepo nangrime kam ka·na aro miksonganirangko somoi gita chu·sokate dingtanganiko ra·bana man·na gita kamko ka·na nangengani giminba Chief Minister aganangaha.
“An·chingni a·gilsako ding·a sin·ani batrororengaha ine pilakan ku·chakna nanggen aro ian sakantinan nangchakeaniko ra·bagen,” ine Sangma aganenba, iandake a·gilsakni dingtang ong·anganiko namatani aro samtangtango ong·telaigiparangko ripingania kamara sorkarini daitosan ong·ja indiba manderangniba ong·a ine parakataha.
Ia salko manianio a·dokni Forest & Environment Minister James PK Sangma-ba jinmana aganprakatengon, ia bilsini World Environment Day-na donsogimin pangchakaniara Meghalaya a·dokna namen krabegipa ong·a ine parakataha.
Forest Minister-ni aganani gitade, Meghalaya a·doko buring bolgrimrang aro samtangtango ong·telaigiparanga manderangni daka rikani aro janggi tanganio nangchapgipa ong·e a·doko songdongenggipa manderang a·doktangko forest economy gita nina nangenga.
Koela bikotenggipa biaprango buring bolgrimrangko ong·atna ja·ku de·enggipa dingtang dingtang project-rangni giminba ia salko manianio Forest Minister jinmana parakataha aro East Jaintia Hills-o niam gri koela bikotanichi moila ong·atako man·enggipa chiring dilgniko rongtalatna aro tangatpilna sorkari miksongenga ineba parakangaha.
Ia salko manianio jinmana aganprakanggipa gipin manderangara, Soil & Water Conservation Minister Hamlet Dohling, a·dokni Chief Secretary MS Rao aro gipinrang ong·a.
Iana skangba, a·dokni Chief Minister Conrad K Sangma, Soil & Water Conservation Minister Hamlet Dohling baksa Madan Lum Shyllong-o World Environment Day-ko maniani bak gita bol ge·anio bakko ra·angaha.
“Hai an·ching pilakan an·chingni samtangtangna aro an·chingni janggi tangenggipa a·gilsakna maikobade on·gilna. An·ching an·chingni a·gilsakna gital dake chanchina, gital dake ong·atna aro tangatpiltaina,” ine bol ge·anio bakko ra·engmiting somoio Chief Minister aganaha.
