Shillong, June 10: Meghalaya a·dokni chadamberangna kamrangko tikate on·na man·jaengani gimin Meghalaya Police-o gital bikotna ra·chakgimin 7th aro 8th battalion-rango ta·raken sipairangko rimnapchina gita Shillong-ni Congress Lok Sabha MP Vincent H Pala, a·dok sorkariko didiangaha.
Shillong MP-ni parakatani gitade, coronavirus giproroengani gimin a·songni dingtang dingtang biaprango poraienggipa aro kamrangko ka·enggipa million 2 chadamberang a·dokona re·bapilaha aro iani a·sel da·o Meghalaya a·doko kamrangko tikate on·na neng·ani ong·batengaha.
“Meghalaya a·doko bilsiantian bang·bea chadamberang, college aro university-rangoni graduate ong·eba kamrangko ka·e cha·na kamrangko man·jaenga aro da·o gipin biaprangoniba bang·bea chadamberangan a·doktangona re·batokengahani gimin kamrangko tikatna neng·batani ong·gnok,” ine Pala parakatenba, ia neng·nikaniko komiatna gita ta·raken MLP-ni 7th aro 8th battalion-rangoba sipairangko rimna a·bachengatchina sorkariko didiangaha.
CMIE-ni report-ko talatangengon, Meghalaya a·doko da·o kamgri ong·e dongenggipa chadamberang 13 percent gapengaha aro ian Meghalaya a·dokni itihaso bang·batgipa ong·engaha ine Pala parakataha.
“Uni gimin Meghalaya Police-ni dolgni battalion-o sipairangko rimani kamrangko a·bachengatchina anga mol·molenga maina iachi a·doko kam tikatna neng·aniko bewalde namatna man·gen,” ine Bristibar salo, Chief Minister Conrad K Sangma-na seatgipa chittio Shillong-ni MP parakataha.
