Geneva, June 1: United Nation-ni World Summit-o Meghalaya sorkarini a•bachengatgipa ‘Meghalaya Entreprise Architecture’ (MeghEA) project, nambatgipa project-ni award ba upattiko man•aha. Ia upattiko ‘The role of governments in the promotion of ICTs for development’ ba ‘namroro silroroanina ICT-rangko ra•doanio sorkarirangni dakna nanggni’ category ba gadango Meghalaya sorkarina on•aha.
Cheani upattiko ITU-ni Secretary General Houlin Zhao-ni jakchi, Mongolbar salo, Meghalaya a•dokni Chief Minister Conrad K Sangma-na, Switzerland a•songni Geneva songjinmao ong•atanggipa WSIS Forum Prizes 2022-o on•aha.
Ia award ba upattina dingtang dingtang a•songrangoni gimik ming 360 project-rangko UN-ni jury seokahachim aro uandaken ja•mano final award-na ming 90 project-rangoniko vote ka•e seokna gita Switzerland a•songni Geneva songjinmaona okamatahachim. Final award-o Meghalaya a•dok, Australia, China, Argentina aro Tanzania a•songrang baksa susana nangaha aro uandaken Mongolbar salo, Meghalaya a•dokna ia category-o nambatgipa project-ni upattiko on•angaha. Ia bilsio Meghalaya sorkarini ‘Meghalaya Entreprise Architecture’ project-mangmangsan India a•song gimikoni cherikna man•aiaha.
Ia Meghalaya Entreprise Architecture (MeghEA) Project-ara, Meghalaya sorkarini ning•o donggipa Planning Department-ni jako ra•e ka•enggipa project ong•a aro ia project-ni ning•o Government to Citizen or Business services, Government to Employee services aro Government to Government service-rangko man•chape dingtang dingtang bakrang donga.
Switzerland a•songni Geneva songjinmao ia upattiko ra•chakangani ja•man Meghalaya a•dokni Chief Minister Conrad K Sangma, jinmana aganprakangengon, ia mingnambegipa upattiko WSIS summit-o man•anichi a•songna mikkim rasongko ra•bana man•ahani gimin Meghalaya a•dokni manderangna an•tangni kusi ong•chakaniko parakangaha. India a•songo skanggipa Entreprise Architecture-ko ra•gatna gita Meghalaya a•doko ka•donganiko on•ahani gimin ua dingtangmancha India a•songni Prime Minister-koba mittelpilangaha.
