New Delhi, June 29: India a·songo COVID sabisina su·enggipa AstraZeneca-ni Covishield, Bharat Biotech-ni Covaxin aro Russia-ni Gamaleya Institute-o taridapgipa Sputnik V tikarang baksana da·o Moderna tikarangba India a·songni bazar antirangona sokbaaha aro iani ja·man da·o Pfizer tikarangba a·songona sokbagnok ine sorkari official-rang parakataha.
NITI Aayog-ni health membor VK Paul-ni parakatani gitade, ia Moderna tikarang India a·songo COVID-ko warachakna su·enggipa tikarangoni brigipa ong·enga aro ian a·gilsak gimiko jakkalna gita tarigimin tikarang ong·a.
Ia Moderna tikako ponggni dake su·gen ineba Paul parakataha.
Ia Moderna tikarangko a·songona ra·bana gita Mumbai songjinmani sam company, re·anggipa June 28 tariko India-ni Drugs Controller General-na dorgastoko on·aha aro Mongolbar salo approval-ko man·soaha ineba kobor on·aha.
India a·songo da·o COVID man·giparang adita komiangahaoba, gittamgipa changna giprorotaina kenchaksoanirang dongengani gimin India sorkari, a·songo songdongenggipa million 940 ja·delgimin manderangko tika su·na kamrangko ta·rakbatatengahachim ine nikna man·a.
Da·o dipet India a·songo million 323.9 COVID-ni tikarangko su·na man·aha.
