Tura, July 26: ‘Tik tok, tik tok’ aro uandake gipin gitrangko ring•e mingsing minggamako man•enggipa Monica D Momin, ba jekon manderang ‘Monica Singer’ ine ma•sibattokachim, batanggimin sal somoirangonin ta•makku palgiparangko champengahani gimin dokkan dakgipa manderangni FIR ka•ako man•ani ja•man, Mongolbar pringo Tura-ni me•chik police-rang, uko sing•sandina gita rim•angaha.
Monica-ko Mongolbar pringo, Tura-ni samba jolo donggipa Chengkurigre songoniko sing•sandina gita Tura women police station-ona rim•angaha.
Koborko on•ani gitade, Monica aro dolsa me•chikrang, ta•makkurangko palna gita licence-rang dongja ine matnangenba, Tura aro Rongram jolrango donggipa mitam dokkanrango ta•makku palaniko champengahachim aro mitam dokkanrangonikode biri, cigarette aro uandakgipa bosturangko ra•seke ra•ahachim.
Mitam bading chiwalgiparangni matnangani gitade, Monica aro uni dolni me•chikrang, uamangni dolo napjagenchimode bading chiwalanirangko dake cha•na on•jawa ineba ka•mikkenatahachim.
Indake ong•engon, Monica-ko sing•sandina gita me•chik police-rangni rim•angani ja•man uni segipa, jekon Nigam ine biming mingachim, ua biaptangoni kate dongenga ine koborko on•aha.
