Itanagar, Sep 6: Mount Everest-ona doange batanggimin sal 20-na gimaenggipa Arunachal Pradesh a•dokni Tapi Mara aro una dakchakgipa Niku Dao-ko sandina gita Arunachal Pradesh a•doko donggipa East Kameng a•jani district administration, satellite-ko jakkalenga ine kobor on•aha.
Sombar salo, East Kameng a•jani Deputy Commissioner Pravimal Abhishek Polumatla-ni parakatani gitade, National Remote Sensing Centre aro Shillong-o donggipa North East Space Applications Centre-ni satellite-o man•gipa noksarangko nie, Mount Everest-o gimaenggipa manderangko sandina jotton ka•engachim indiba da•o dipet a•bri doanggipa manderangko nikpilkujaenga.
Arunachal Pradesh a•dokni Tapi Mara, India-Tibet simani metre 6890 ong•e chugipa Mount Kyarisatam (Mt Chiumo)-ona doangahachim ine DC parakataha.
A•bri doanggipa manderangoni sakdokde August 29 attamon Seppa-ona sokbapilaha indiba Tapi Mara aro Niku Dao-de August 17 tarikonin gimaengachim ineba DC parakataha.
Batanggimin salrango dontonggija mikka waangahani a•sel Kameng, Kania aro Wapriyang Bung chiringrangko man•chape ia jolrango donggipa pilak chiringrangan dal•baaha ine janapatengon, mikkarang namkalangahaon, gimaenggipa manderangko sandina gita Army-rangni bolbri helicopter-rangko tarie donataha ineba Polumatla parakataha.
A•bri doanggipa mande sakgniko sandina gita Arunachal sorkari, Tezpur-o donggipa Indian Army-ni Gajraj Corps-ni dakchakanikoba bi•ataha ine kobor on•aha.
2009 bilsini May 21 tarikoba Tapi Mara, a•gilsak gimiko chubatsranggipa a•briona maldoangahachim.
