Shillong, Sept 19: Meghalaya Pradesh Congress Committee (MPCC)-ni gital president-na songako man·gipa Vincent Pala, Sonibar salo kamtangko jako ra·angaha.
Shillong-ni Lok Sabha MP Vincent H Pala-ko re·anggipa August jani 25 tariko All India Congress Committee (AICC)-ni dilgiparang, MPCC-ni gital president songahachim.
Sonibar salo, Shillong songjinmani State Convention Centre-o MPCC-ni gital president ong·e kamko jako ra·angani ja·man kobor ra·timgiparang baksa agangrikengon, Meghalaya a·doko Congress dolko nangrimatani aro a·dokni pilak biaprangon Congress dolko mingsingatna gita bimingrangko segatanian uni mongsonggipa daito ong·gen ine Pala parakataha.
Mikkangchi election-rango chegipa ong·na gitade Congress dolni ning·o meli nangrimani aro ka·donggrikani dongna nanggen ineba ua aganaha.
Uni kamtangko jako ra·angani somoio Congress dolni dal·dalgipa dilgiparang, jekai Mukul Sangma aro gipin dilgiparangde dongpajahachim. Iani bidingo talataniko on·angskaengon, Mukul Sangma aro uni gisepo maming ma·sisretgrikanirang dongja aro ua bakan Sangma-ko gronggen ine Pala parakataha.
Garo Hills-ba Khasi Hills gitan apsan dake dal·a aro Congress dolko dilanio ua Garo Hills-o donggipa Congress dolni dingtang dingtang dilgiparangni ku·pattianirangko ra·gen ineba MPCC-ni gital president aganaha.
2023 bilsini Assembly election-na tarisamsoani gimin janapatengon, NPP-o MLA-rang bang·batgenchimoba Congress dolko seokgipa manderang bang·batskaa aro ia changode Congress dol, seokgiparangko bang·batatgen ine Pala aganaha.
Pala-ni kamtangko jako ra·ani somoio Meghalaya a·dokko nirokenggipa AICC-ni dilgipa Manish Chatrath-ba dongpae bakko ra·angengon, Congress dolni ning·o maming meligikgijanirang dongja ine a·kangataha. Mukul Sangma aro Vincent Pala sakgnian mikkangchi Congress dolko mangrakbatatna gita nangrime kamko ka·anggen ineba Chatrath aganaha.
