Shillong, Sep 13: Meghalaya Public Service Commission (MPSC)-ni ning•o bangbang ong•e dongenggipa ge 1301-na baten kamrangko gapatna gita kamrangko ka•engaha ine Mongolbar salo, Meghalaya a•dokni Chief Minister Conrad K Sangma parakataha.
Kamna interview-rangko ra•anio MPSC ja•manchakrongengani gimin Mawlai-ni MLA Process T Sawkmie-ni Assembly-o sing•anina aganchakengmiting somoio ia kattarangko Chief Minister parakataha.
Mawlai MLA-ni sing•doanirangna aganchakaniko on•angengon, bangbang ong•e dongenggipa kamrangko gapatna kamrangko ka•engaha aro iana porikkarang baksana interview-rangko ta•raken ong•atna sorkari ku•rachakenga ine Sangma, Assembly-o parakataha.
Enforcement inspector aro bangbang ong•e dongenggipa gipin kamrangna porikkarangko ra•ningjaengani gimin Mawsynram-ni MLA Himalaya Shangpliang-ni sing•anina aganchakaniko on•angskaengon, batanggimin bilsigni ba gittamni gisepo COVID -19 sajinmani a•sel dingtang dingtang neng•nikanirangko chagrongna nangaha ine Chief Minister parakataha.
Indake ong•engon, a•doko MPSC-ko namdapatchina bi•aniko a•dok sorkari da•o nienga ineba Chief Minister parakataha.
Chief Minister-ni parakatani gitade, porikkarangko ra•anio technology ba gital kolrangko jakkalani, pilak kamrangnan apsan poraiani gadangchi apsan porikkako ra•ani aro porikka sechakgipa centre-rangko bariatchina bi•anirangkoba da•o sorkari niengkua.
Meghalaya Combined Competitive Exam Rules-ko ra•gatchina ku•pattie on•anirangba dongengkua ineba Chief Minister, Assembly-o parakataha.
