Guwahati, 17 December: Silk ba muga eri kilding Assamni mikkim rasong ong·ani aro Assam jolosa uko man·batgipa a·dam ong·ania Vanya Sericulture-o mingknabeani ong·a. Indiao man·gipa muga kilding gimikan ong·nasipile salgro-salaramni a·dokrangoni ong·katgipa ong·a.

Namgipa muga bitchilrangko ripinganian muga kildingko bikotani karkanao bolgro gita ong·a. Muga kildingko bikotanio tang·dororona gitade sabisi grigipa muga bitchi ba bitchilrangko chu·onga gita man·anian ong·a.

Namgipa rokomni bitchi ba bitchilrangko chu·onga gita man·anian muga jo·ong bitipko bang·e man·ani ja·pang ong·a. Salgro-salaram a·dokrango Vanya silk Indiao chu·gimik man·gipa silk kilding gimikoni bak gittamni baksa ong·a, aro joltango manderangni janggi tanganiko aro me·chikrangni gadangko ra·dona chol gnanggipa ong·a. Rokom 4 silk — Mulberry, Oak Tasar, Muga, Eri — salgro-salaram a·dokrangosan iarang gimikko man·gipa ong·e dingtangmancha niksenganiko man·a. Ia rokomni silkranga Indiani ong·telaigipa rokomrang ong·a, aro uarang salgro-salaram a·doko songdonggipa manderangni dakbewal ka·bewal aro janggi tangani bewal baksa ru·uta chasongrangnan stitgrikgimin ong·a.

Adita salrangna skang, Muga Eri Silkworm Seed Organization (MESSO), Guwahatini Central Silk Board a·damo Muga Reshom Krishi Mela, 2023-ko ong·ataha. Uan salgro-salaram a·dokrango sericulture-ko jako ra·giparangko gimikni gitan ra·dona miksonge tom·ani ong·a. Ua tom·anio sericultureko jako ra·e gamgiparang baksana ia a·bao scienceni gita kam ka·enggipa manderang, Central Silk Board, Guwahatini manderang aro sorkarini manderang bak ra·aha.

Tom·anio Dilip Kumar Borah, IAS, Secretary, Department of Finance, Handloom, Textiles & Sericulture, Govt. of Assam mongsonggipa sokgipa ong·aha. Dr Arup Kumar Misra, Chairman, Pollution Control Board, Assam guest of honour ine okamako man·skaaha.

Tom·anio gipin mongsonggipa sokgiparanga Lakheshwar Saikia, IRTS, Chief Commercial Manager, NE Frontier Railways, Guwahati; Dr R Murugesan, Director NIRD-NERC Guwahati; Professor Ashish K Mukherjee, Director, IASST, Guwahati.

Indiao Muga Silk-ko man·a gimikoni 100% aro Oak Tasar aro Eri silk-ko India gimiko man·aoni 99% salgro-salaram a·dokrangonin ong·a ine chief guest Dilip Kumar Borah aganaha. Central Silk Board, silk kildingni bidingo a·songna dangdike on·a bilsi 75 gapaniko maniengako ua aganjolaha. A·gram galenggipa a·arangko sericulture a·dam ong·atskana aro indakgipa dingtang dingtang cholrangko bikote Assamo game cha·giparangko ra·doani bidingoba Borah rama mesoke aganaha.

Muga aro eriko bikotani kamrango MESSO-ni dakenggipa kamrang aro mongsonggipa ong·ani bidingo MESSOni Director Dr. K. Neog kan·dike aganaha.

“Vocal for Local” aro “One Station One Product” ina bewalo re·mikkangani bidingo Lakheshwar Saikia agane, uarang maikai salgro-salaram a·dokrango sericultureko tang·doatna man·gen, talatjolaha.

Ia Resham Krishi Mela sericultureko dingtang dingtang bewalrango jako ra·enggipa manderangni chanchirimna nambegipa tom·bimongani ong·aha. Muga jo·ong jilaniko nambate dakangkuode uan bang·a manderangna kam nakatate janggi tangani cholrangko on·gen ine tom·bimonganio niksamsona man·aha. Tom·anio Assam, Meghalaya aro Arunachal Pradesh a·dokrango muga jo·ong jilanio nambatroroenggipa sak 6na, sakprako Rs 5,000/- ka·e boksis on·aha.

Iakoba poraie nina man·gen: Kettelebell de·susaanio Meghalayaoni gold medal man·a aro recordko ong·ata