Shillong, Dec 20: Mukroh songo ong·enggipa obostarangni bidingo Assam aro Meghalaya a·dokni chief minister-rang agangrikjringenga ine Meghalaya a·dokni Chief Minister Conrad K Sangma, Mongolbar salo Cabinet tom·a matchotani ja·man parakataha.
Chief Minister-ni parakatani gitade, batanggimin salgnini gisepo ua baditaba chang Assam-ni chief minister baksa agangrikaha aro re·baenggipa salrangoba uamangni gisepo agangrikangkuna sienga.
Re·anggipa November jani 22 tariko Mukroh songo ong·anggipa a·selni ja·man, Meghalaya a·dok ning·o ga·akgipa Assam-ni Forest Beat House-ko jolo songdongenggipa manderang so·ahachim indiba ia Forest beat house-ko Assam-chipakni rikpiltaiahani gimin Mukroh songo adita so·sojengjeng ong·na a·bachengpiltaiahachim.
Indake ong·engon, ia obostako ua nipiltaienba nangani kri ja·kurangko de·anggen ine Meghalaya a·dokni Chief Minister Conrad K Sangma parakataha.
Meghalaya a·dok ning·o gipin sorkari ba je dolba ong·china, niam gri dakna man·jawa ineba Chief Minister parakataha.
Karbi Anglong Autonomous District Council (KAADC)-ni bidingo mamingkoba aganna gita jechakangengon, dolsa dolgipinni gisepo name agangrikanirang aro ma·sichakgrikanirang donggenchimode iandakgipa obostarangko namatna ba komiatna man·genchim ine Sangma parakataha.
Border Outpost-ko Barato-o songjawa indiba Mukroh-osa songgen ineba Chief Minister talataniko on·angaha.
Mukroh-na Border Outpost-ko sorkari on·manaha ine janapatengon, ia outpost-ona sak 30-mangni gita sipairangko watatmanaha aro ian permanent post ong·aha ine Chief Minister parakataha.
