Tura, March 30: Meghalaya a•dokni job reservation policy-o roster system-ko ra•gatani bidingo jera ra•grikanirang batrorobaengon, roster system-ko gitcham Congress sorkarini somoion Garo National Council (GNC)-ni gitcham president aro gitcham MLA, ra•gatchina resolution-ko ra•ahachim indiba ua somoio gitcham chief minister Dr Mukul Sangma-ni dilanichi a•dok sorkari, membor-rang baksa chanchirimchenggija uni resolution-ko amataha ine Bristibar salo GNC-ni general secretary Augustine R Marak parakataha.
Roster system-ko ra•gatanichi darang jatrangba an•tangtangni bil aro man•gnirangko gimaatjawa batesa pilak jatrangan an•tangtangna tikatgimin bak rengsiko man•gen ineba Marak parakataha.
“Meghalaya a•doko Roster system-ko ra•gataniara maming gital niamko ra•gatenga ong•ja maina ia roster system-ko Madhya Pradesh, Karnataka aro uandakgipa a•dokrangoba ja•rikenga. Reservation policy-ko rakkianio Roster system-ko nangchongmota aro iani giminsa Meghalaya High Court-ba raiko on•ahani gimin an•ching pilakan High Court-ni rai on•aniko mande ra•na nanga,” ine GNC-ni general secretary parakataha.
Meghalaya Job Reservation Policy aro Roster system-ko ja•rikna nangenga ine janapatengon, ia Roster system-ni bidingo jera ra•e dongchagija High Court-ni ge•etaniko chu•sokatna nangchongmota ine Marak, a•dok sorkariko didiangaha.
