Guwahati, July 7: Assam a•doko songdongenggipa dol 5 muslimrang jemangan Assamese ku•sikko agangiparang ong•achim uamangna songpanggipa muslimrang ine chanatako on•ahanina opposition Congress aro AIUDF dolrang Assam skotong minister Hemanta Biswa Sharmako matnangattokaha. Ian Assamni mulslimrangko tong•tang tong•tang dake uamangni meli-nangrimaniko gruatna miksongmanchae ka•anisan ong•aia ine matnanggiparang aganaha. “Khilonjia Muslimrang Assam a•doko bilsi 100 mangna songdong-a•chaenga. A•palchini napdrabagipa muslimrang re•bahaon ia dongsogipa Assamni muslimrangba uamang baksa dongbrinaiaha. Uamangara songpanggipa muslimrang ong•a, unigimin uamang ia dingtangmancha chanteaniko man•a kraa.
Beben Assam ni pilak Muslimrangan Assameserangan ong•a, iana na•simang jajrengna nangja” ine Himanta Biswa Sharma kobor ra•timgiparangna Guwahatio aganaha.
Goria, Moria, Jolah, Desi, Syed ia dolrangara asol Assamni songpanggiparang ong•e Assamese ku•sikko aganenggiparang ong•a, uamangna Assam sorkari dingtangmanchagipa “indigenious status” ingipako on•aha.
“An•chingni India a•songni niam bidiko jatrangko indake sual-ra•rone bak dakani bidingo maming aganani dongja, jean niamni a•palo ong•a. Assam sorkari muslimrangko grugraatnasa iako dakenga” ine AIUDFni Aminul Islam aganaha.
Muslim manderang Assamo mande jelaoni 35% mangni jelgipa jat ong•a. Uanoni 4% mangsan Muslimrang Assamese ku•sikko aganenga. Assamo Bengaliko agangiparangsa bang•bata. Assamo BJP sorkari, Bangladeshoni katbagipa Bengali ku•sikko agangipa Muslimrangni kosako nisan done kam ka•enga.
Indiani niam bidikni gitade Indiao songdonggipa sakantian songpanggiparang ong•a. Ian Himanta Biswa Sharmani niamni a•palo dakdraanisan ong•aia ine Assam MLA aro congress dolgipa Rockybul Hussain aganaha.
