Imphal, July 7: Myanmar a•songo India a•songni mande sakgniko so•otanina jegale, Manipur a•dokni Moreh-oni manderang jinma Myanmar a•songona napangenba army-rangni sentry post-ko so•ani ja•man ia jolrango chel•chakgipa sipai dolrangko bilakbate donataha ine official-rang u•iataha.

Ia a•sel ong•ani ja•man, Manipur a•dokni Tengnoupal a•jao donggipa Moreh jolrango CrPC-ni Section 144-ko ra•gatangaha aro ia biaprango jolni police aro ma•mongoni sipai dolrangkoba dondapataha ine kobor on•aha.

Manipur a•dokni Tribal Affairs aro Hills Minister Letpao Haokip-ni kobor ra•timgiparangna parakatani gitade, Myanmar a•songo so•ota man•gipa Tamil mande sakgnini manggisiko ra•bana gita Manipur sorkari rake kamko ka•enga aro manggisirangko ra•bana gita Myanmar aro India sorkarirangni songgigrikaniko senge dongenga.

Bilsi 28 ong•gipa P Mohon aro bilsi 35 ong•gipa Aiyanaar sakgnian Moreh-o auto sale cha•enggiparang ong•achim aro uamangko Mongolbar salo, ma•sina man•gijagipa manderang, Myanmar a•songni Tamu jolo goe galahachim.