Aizawl, Sept 12: Myanmar a·songoni gital dake katnapbagiparang dongtaiahani gimin Mizoram a·doko katnape songdong a·chaenggiparang sak 11,000-mang gapengaha ine Sonibar salo official-rang parakataha.
District administration aro police official-rangni u·iatani gitade, batanggimin salrango me·chik aro bi·sarangko man·chape sak 150 ba sak 160-mangni Myanmar-oni katbae Mizoram a·dokni Champai, Lawngtlai aro Hnahthial a·jarango katnapetokaha.
Myanmar a·songo sipai dolrang aro warachakgipa dolrangni gisepo dinggrikani aro chadrapgrikanirang ong·angkugenchimode mikkangchi bang·bata manderang Mizoram a·doko katnapkunaba gnang ine Mizoram a·dokni Home Minister Lalchamliana, kobor ra·timgiparangna parakataha.
Myanmar-oni katnape dongenggipa manderangna Mizoram a·dokni Young Mizo Association-ko man·chape dingtang dingtang dolrang, dongchakna gita biapranko tarie on·enba, cha·ani ringani, sam aro uandakgipa nangchongmotgipa bosturangko suale on·enga ineba kobor on·aha.
