Shillong, March 13: California, Los Angeles-o chang 95-gipa Academy Awards ceremony-ko ong·atanggipao, India-ni jawilwatrang aro gitrang Oscar award-rangko cheanichi Indian cinema-na gitalgipa chu·soktaiani ong·an baksa chasongrangna gisik ra·na krabegipa sal ong·angaha.
RRR jawilwatni ge·sa mingsinggipa git, “Naatu Naatu” ingipa, Best Original Song award-ko cheaha aro “The Elephant Whisperer” jawilwat, Best Documentary Shorts category-o award-ko cheskaaha.
A·gilsak gimiko ong·katatgipa dingtang dingtang jawilwatrangoni Daniel Kwan aro Daniel Schienert-maangni dakdil-ka·dilgipa, “Everything Everywhere All at Once” jawilwat, Best Picture, Best Director, Best Actress, Supporting Role-ni Best Actor baksana Best Actress-o chegipa ong·e dingtang dingtang gadangrango award-rangko chee niksengbatgipa ong·skaaha.
Batanggimin adita bilsirango, a·songo tarigipa jawilwatrang jekai “Slumdog Millionaire” aro “Life of Pi” iarango Oscar-rangko cheanichi India-ni film industry-ko a·songgipinrangoba ra·chakaniko nikna gita man·aha aro ian a·songni jawilwatna, film industry-na aro uno dakmesokenggipa pilakna dal·bea chu·sokaniba ong·aha ine nikatna gita man·enga.
Ia 2023 bilsini Oscar award-rangko cheanina, India-ni jawilwatko nina namnikgipa a·gilsak gimikchini manderang an·tangtangni kusi ong·chakaniko social media-rango parakattoka baksana, India-ni jawilwatrangko tarigipa, uno dakmesokgiparangni mikkangchi chu·sokgninaba manderang uamangni namgipa sikanirangko on·attokaha.
