Shillong, Oct 1: Sonibar salo, ‘Sankalp Saptaah’ minggipa antigimikni program-ko New Delhi songjinmani Bharat Mandapam-o a·bachengate on·angani somoio a·songni Prime Minister Narendra Modi, a·song gimiko nambate kamrangko chu·sokatenggipa district ba a·jarang baksa agangrikangaha aro ia dam a·jarangoni North Garo Hills a·jaba damsa ong·pae a·songni Prime Minister baksa agangrikna cholko man·aha.
Ia Aspirational Block Program-ara India a·song gimiko donggipa dam 329 a·jarangoni dam 500 nambatgipa block-rango sorkarini kamrangko namdapatna aro manderangni janggi tangani gadangko namdapatna a·bachengatgipa program ong·a aro ia dam 500 block-rangoni North Garo Hills a·jao donggipa Resubelpara Block-ba damsa ong·e, ia block-ni Junior Rural Development Officer Mikehenchard Ch Momin, video conference gita a·songni Prime Minister baksa agangrikna cholko man·aha.
Meghalaya a·dokara mikka wabatsranggipa biaprangoni damsa ong·e songadam nokadamrango namroro silroroaniko ra·bana a·bachengatgipa program-rang, jekai nok rike on·ani scheme aro uandakgipa program-rangko maikai chu·sokatenga ine PM Modi-ni sing·anina aganchakaniko on·angengon, Meghalaya a·doko bilsiprakon ja 7 ba ja 8-mangna mikkarang warongani a·sel PMAY-G gita dakgipa scheme-rangko chu·sokatanio bang·en neng·nikanirangko chagrongna nangronga indiba uamang rike on·na sienggipa nokrangko hisapani ja·man pangnan nangchongmotgipa bosturangko chimonge donchina gita beneficiary-rangko aganronga aro mikkarang namangahaon nokrangko rikna a·bachengate, kamrangko nirokna gita official-rangko songe donronga ine Momin talataniko on·angaha.
Meghalaya a·doko aro mongsongbate Resubelpara block-o kam ka·ani bewalna kusi ong·chakaniko parakatengon, scheme-rangko jolni nangani krisa chu·sokatna gita ma·mong sorkari, kamrangko dingtangataha aro pangnan scheme-ni tangkarangko nok nokgipanasa on·na nanga aro nok nokgipa an·tangsa kamko ka·na nanga ine PM Modi parakatskaaha.
Garo Hills-o man·enggipa cashew-rangni gimin PM Modi-ni sing·anina aganchakaniko on·angskaengon, Garo Hills-o man·gipa cashew-rangan a·songo tobatsranggipa ong·a ine Momin parakatenba, MGNREGS-ni ning·o donggipa Village Employment Council (VEC)-rangko aro Self Help Group (SHG)-rangko cashew ge·china gita didienga ine talataniko on·angaha.
Garo Hills-o da·o dipet cashew processing unit damsamangmangsan dongaia ine janapatengon, Garo Hills-o cashew game cha·enggipa manderang nambate badingna man·na gita processing unit-rangko kulidape on·china Momin, a·songni PM Modi-ko mol·molataha.
Find latest news from every corner of Northeast India at hubnetwork.in, your online source for breaking news, video coverage.
Also, Follow us on-
Twitter-twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/nemediahub
