Tura, Oct 26: Mongolbar salo, Meghalaya a•dokni Chief Minister aro NPP-ni national president Conrad K Sangma, Rajabala constituency-ni ning•o donggipa Babilgre songona re•ange NPP-ni candidate Abdus Saleh-na campaign ka•angaha aro campaign ka•anio unbaksa Meghalaya Assembly-ni Deputy Speaker Timothy D Shira, GHADC-ni Chairman Rakesh A Sangma aro Kharkutta-ni MLA Rupert Momin-ba dongpae bak ra•angaha.
NPP-ni candidate-na campaign ka•anio NCP-ni state president aro Gambegre-ni MLA Saleng A Sangma-ba dongpae bak ra•angaha.
Ia tom•anio Chief Minister aro NPP-ni national president, jinmana aganprakangengon, election-ni mongsonggipa ong•ani gimin aro election-ko ong•atani miksongani gimin songni nokni manderangna agan-talate on•angaha.
Election-ni somoio dilgipako seokna nangani gimin aganangengon, namroro silroroaniko ra•bana gitade dilgiparang, sorkarini bak ong•na gita nanga ine Sangma parakataha.
Sorkariko chalaienggipa dolni candidate-sa sorkari baksa kamko ka•e manderangna namroro silroroaniko ra•bana cholrangko man•bata ine talataniko on•angengon, ia bye-election-o sorkariko chalaienggipa dolni candidate-nasa pu•onchina gita Sangma didiangaha.
Skangoba NPP-ni candidate Abdus Saleh, changgittamna kingking Mahendraganj-ni MLA ong•manahani gimin da•o ia bye-election-oba ua seokako man•taigenchimode an•tangni kam changanichi ua manderangna nambate dangdike on•na man•gnok ineba NPP-ni national president aganaha.
Ia tom•anio Meghalaya Assembly-ni Speaker Timothy D Shira-ba jinmana aganprakangengon, ia bye-election-o UDP-ni candidate ong•e susaenggipa Ashahel D Shira-de uni gritangan ong•achim indiba doltangna kamko ka•anian uni skanggipa daito ong•ani gimin NPP-ni candidate Abdus Saleh-ko chegipa ong•atna ua kamko ka•enga ine parakangaha.
