Guwahati, April 26: Salantio nanggipa bosturangni damrang tang·dopretenganina, All Assam Students’ Union (AASU)-ni manderang Upper Assam, Dibrugarh-o Mongolbar salo jingjengatangaha.

AASU, Dibrugarh district unit-ni manderang, dingtang dingtang kattarangchi jegale segimin banner-rang, poster-rang baksa Dibrugarh-ni Old Government Boys’ High School Field-oni re·jomaniko a·bachengate Mawwaripatty-chipakna mikkangange Assam sorkarini kosako chrik-a·bokroroe jegalaniko dakangtokaha.

“Salantio nanggipa bostuni damrang ia somoirango tang·dopretenganiko Assam sorkari nirokjaenga ine matnange agananangen, LPG-ni dam gong hajal 1200-ona bariaha aro manderangni salantio jakkalenggipa bosturangni damba tang·doaha jeni a·selo ramram manderangde nokdangtangtangko chalaianio namen neng·nikanirangko man·na gita nangengaha,” ine AASU-ni district secretary Aboni Kumar Gogoi, parakataha.

Bostuni damrang nangana bate tang·doenganiko nirokate komiatani gimin maming ja·kurangko de·ata dongjenganina, AASU-ni dilgipa, Assam a·dokni skotong minister Pa Himanta Biswa Sarma aro Food and Civil Supplies minister Pa Rajit Das-maangni kosakoba matnange aganangaha.

Damrang tang·doanichi ramram mannderangni neng·nikaniko namatna bakan ja·kurangko de·atchina Assam sorkariko didiangenba, toni damkoba komiatna nangchongmota, maina manderangna dangdike on·na gitan sorkari kang·kare kaaha, indiba bostuni damrang tang·doenganiko niatode a·dok sorkarini daitangko chu·sokatna man·gijaniko nikatna gita man·enga ineba Aboni Gogoi, sorkarini kosako matnange agandapataha.