Williamnagar, April 1: 2021 ni December 1 tarikoni a•bachengatgipa Puneet Sagar Campaign ni gita sagal rikam, chiring-chibima rikamrangko rongtal-an•tale rakkina kam ka•enga. National Cadet Corps rangba Puneet sagar campaignko a•bachengata intalan gisik nangbee bak ra•paenga.
Meghalayani 41 gipa NCC battalion dolrang, NCC headquarter Shillongoni dakchakako man•e, Simsang chibimako rongtal-an•tale rakkiani bidingo manderangna awareness programrangko ong•atrongengaha. Simsang chibima jekon Bangladesh a•songo Someshwari ine inskaa, Nokrek a•brioni jokbae A•chik a•songni bang•a songrangko nappake Bangladesh-o braea. East Garo Hillsni skotong Williamnagar, Nongalbibra, Siju, Rewak aro South Garo Hillsni headquarter Baghmara gita jokpake Bangladesh a•songni Netrokona district-o braea. Williamnagarni Loyola college aro Williamnagar Govt. Collegeni 41 gipa Meghalaya NCC Bn. dolrang 2022 ni April 1 tariko 150 Senior Division (me•asarang) aro Senior Wing Cadets (me•chikrang) gimik sak 200 chatro-chatrirang awareness rallyko Williamnagaro ong•atangaha.
Simsang chibimako rongtal-an•tale rakkiani bidingo Loyala collegeoni a•bachenge Simsang chibimaona re•ange ia tom•aniko dakangaha. Tom•anio rimchaksoani kattarangko Loyala collegeni principal Dr. Sunny Augustine aganaha. Ia rallyo Williamnagarni ADC aro municipalni CEO Shri Alosyius Ch. Marak aro Divisional Forest officer Sathish K.S dongpae adita didiani kattarangko aganangaha.
Uamang Simsang chibima rikamona re•ange plasticrangko aro dingtang dingtang jabolrangko rongtalatangaha. Havildar Mohammad Kabi Sheik, Havildar JR Reddy, Loyala collegeoni Associate NCC officer Lieutenant Dafflin aro Williamnagar Govt. Collegeoni care taker officer Ms. Balkari B Sangma ia tom•aniko name ka•dilangaha.
