New Delhi, Oct 20: Swami Vivekananda-ni Educational and National Education Policy 2020-ni bidingo Ramakrishna Mission Vivekananda Educational Research Institute (RKMVERI)-ni ong•atgipa Webinar-o aganengon, changsao dingtangdingtang a•gilsakni chatro chatrirang Science aro Arts-ni gimin skie ra•na Nalanda aro Taxilla (Takshashila)-ona re•bae skie ra•tokachim.
Kakketko aganode Swami Vivekananda-ni ‘Vasudhaiva Kudumbakam”-ni bidingo nisamsoaniara da•alo ia chasongni skia porani a•jao namgrimani gnang, jean skia poraniara dake nie ma•sianio pangchakachim.
Nambatsranggipa ui•a ma•sianiko skie ra•aniara sakanti manderangni neng•nike janggitangaoniko naljokatanin ong•a ine Sanskrit Shloka-o ‘ Sarve bhavantu sukhinah/sarve santu niramayah/Sarve bhadrani pasyantu/ Ma kascidduh khabhagbhaveta’ ine agangipao pangchake Minister agandapaha.
Vivekananda-ni niksamsoaniara skia porako ra•engon ong•telaiani rokomo pangchake skie ra•ani, ong•telaigiparangni nitoanio kusi ong•ani, jatni dakbewal rikbewal aro toromni bidingo skie ra•anirang donganiko Dr. Pokhriyal namnikbee ra•chakachim.
Dr. Pokhriyal-ni aganani gita, ma•mong sorkari gitalgipa education policy-ni ning•o cha•tote ba dake rike nie skie ra•anikon mongsongbate ra•enga ine Webinar-ni somoio aganaha.
National Education Policy 2020, ian Swami Vivekananda-ni niksamsoe ja•ku de•ani ong•a. Saksa gisik gnanggipa indake agana ‘Mande jekon skia man•a uko ning•o donaina nangja’. Indakgipa skia porani bimangkosa an•ching nangenga, jean skia man•achi gisikkosan matsramataijawa indiba cholon bewalkoba namdapatatna dakchakani ong•gen ineba ua agandapaha.
National Education Policy-ko ra•gatanichi Vivekananda-ni niksamsoaniko chu•sokatna jotton ka•enga aro ian an•chingni a•songnasa ba songsul a•songnasa ong•aijawa indiba pilakkon man•gopgiminsa ong•gen. Iachin a•songo songdonggiparangna apsangrik cholko on•ani aro gamchatani gnanggipa ong•atgen ineba Dr. Pokhriyal jaksi otaha.
Ua Prime Minister-ni man•gopgimin skia porako ra•anio gital skie ra•na tarigiminrang 5+3+3+4 jean bilsi 3-8ona, bilsi 8-11ona, bilsi 11-14ona aro 14-18ona bilsi kri tok tok dake done skianiko on•aniba skia pora ra•anio Vivekananda-ni nisamsoani ong•achim, jean a•bachenge skie ra•ani ku•siktangchi aro chu•a gadango skie ra•anioba man•a dipet ku•siktangchin dakna miksongani gnangchim. Ia gital Education Policy-ni ning•o ku•siktangchi skie ra•aniko skanggipa dake donenga ineba minister agandapaha.
A•songni technology-o silroro namroroani gimin aganengon, skia pora ra•anio Science baksa nangrime gital jakkalni bosturangko ong•katatna niksamsoe skie ra•anichisa an•ching a•gilsakni gipinrang baksa susaanio chu•sokgipa ong•gen aro ia niksamsoanion National Technological Forum-ko IIT aro IISER-rangni dakchakanichi songaha ineba Dr. Pokhriyal agandapaha.
Ma•mong sorkari da•alo a•gilsakni dingtang dingtang bakrangonikon uamangni chadamberangko India a•songo skia porako ra•echina okamenga, kakketko aganode Indiani manderangan a•gilsakni mingsinggipa organisation-rang jedake Microsoft aro Google-rangoba mongsonggipa kamrangko ka•engachim. Asia-ni hajalni hajal chatro chatrirangan da•ode Indiaona poraina re•baengaha ineba Minister ui•dapataha.
Webinar-o sakgipin agangiparangara, Swami Suviranandaji, Chancellor, RKMVERI, Swami Atmapriyanandaji, Pro-Chancellor, RKMVERI aro Swami Sarvottamandaji, Vice Chancellor, RKMVERI iamangba dongpaachim.
