Shillong, June 16: National Herald case-ni bidingo Enforcement Directorate-ni gita All India Congress Committee (AICC)-ni dilgipa Rahul Gandhi-ko dos gale, sing•sandianirangko dakchina ge•etahani gimin Bristibar salo, Meghalaya Pradesh Congress Committee (MPYC), ma•mong sorkarini kamko jegalataha.

Iani bidingo kobor ra•timgiparangna talataniko on•angengon, ia pilakan 2024 bilsio election ong•na siengani gimin manderangko ma•sisretatna gita politics kal•anisan ong•aia ine MPYC-ni president Adrian Chyne Mylliem parakataha.

India a•songo nangchongmotgipa bosturangni dam rakbatroroengani gimin, manderangna an•seng baljokanirangko on•na man•jaengani gimin aro uandakgipa dingtang dingtang kamrangni gimin MPYC-ni president, BJP-chi dilenggipa NDA sorkariko matnangatskaaha.

Bosturangni damrang rakbatroroengani a•sel salo hajira ka•e cha•enggipa manderangde neng•nikanirangko man•batna nangengaha ine janapatengon, LPG aro pilak nangchongmotgipa bostuni damrang rakbatroroengahaoba, manderangni neng•nikanirangko namatna gita sorkari mamingkon dakjaenga ine Chyne parakataha.

Sorkarini dilgiparang man•e cha•batroroangengon, kangal cholgrirangde batesa kangal ong•roroangskaengaha ineba MPYC matnangataha.